ەرماحان ىبرايىموۆ: گەننادي گولوۆكين 5-ءشى راۋندتا جەڭىسكە جەتەدى
  • ۇنحاتتاعى دوستىق شەڭبەرىمە جولدايمىن !

  • قازىرگى ورنىڭىز:اق جاۋىن حابار كانالى             جولدانعان ۋاقىتى:2016-04-21 01:39:21            كورىلىمى:237


    WBA (Super)، IBO، WBC (Interim) جانە IBF نۇسقالارى بويىنشا ورتا سالماقتاعى الەم چەمپيونى، قازاقستاندىق گەننادي گولوۆكين (34-0، 31 كو) 23 ءساۋىر كۇنى (استانا ۋاقىتىمەن 24 ءساۋىر) امەريكالىق بوكسشى دومينيك ۋەيدكە (18-0، 12 كو) قارسى جەكپە-جەككە شىعادى. 

    سيدنەي وليمپياداسىنىڭ چەمپيونى ەرماحان ىبرايىموۆ گولوۆكين-ۋەيد جەكپە-جەگىنە قاتىستى جاساعان بولجامىمەن ءبولىستى. 

    «گەننادي گولوۆكين امەريكالىق بوكسشى دومينيك ۋەيدكە قارسى جەكپە-جەكتىڭ بەسىنشى راۋندىندا جەڭىسكە جەتەدى. قارسىلاسىنىڭ ۇزاققا شىداي قويۋى ەكىتالاي. جالپى، مەنىڭ ۋەيدكە قاتىستى پىكىرىم ەكى ۇشتى. ءبىر جاعىنان، ۋەيد-بىزدىڭ بوكسشىمىزعا لايىق قارسىلاس ەمەس. قازىرگى تاڭدا گەنناديمەن تەڭ ۇرىسۋعا ءتورت-اق بوكسشىنىڭ شاماسى كەلەدى. ولار-ساۋل الۆارەس، فلويد مەيۆەزەر، سەرگەي كوۆاليەۆ جانە دميتري پيروگ.   

    ال، ۋەيدكە گەنانىڭ دەڭگەيىنە جەتۋ ءۇشىن ءالى ءوسۋ قاجەت. ەكىنشى جاعىنان، گەننادي سەكىلدى الەمدەگى ۇزدىك بوكسشىلاردىڭ بىرىنە قارسى شىعۋدان جۇرەكسىنبەۋى-ۋەيدتىڭ دە باتىل جىگىت ەكەنىن كورسەتەدى. سول ءۇشىن دە ونى گەناعا لايىقتى قارسىلاس دەپ ەسەپتەۋگە بولاتىن شىعار.. .  »، -دەيدى ە. ىبرايىموۆ. 

    ايتا كەتەيىك، جەكپە-جەكتى 24 ساۋىردە 07:20-دان باستاپ «قازاقستان» ۇلتتىق تەلەارناسى مەن kaztrk. kz سايتى تىكەلەي ەفيردە كورسەتەدى. «قازمەديا ورتالىعىنىڭ» لەد-ەكراندارىنان تاماشالاي الۋ مۇمكىندىكتەرىڭىز بار. سونداي-اق، «قازاقستان» ۇلتتىق تەلەارناسى جانكۇيەرلەر اراسىندا ەكى Samsung Galaxy A3 سمارتفونىن ويناتۋدا. ونىڭ شارتتارى Kaztrk. kz سايتىندا ورنالاسقان. 
    ءبىزدىڭ انىقتاما:  

    ەرماحان ىبرايىموۆ 1972 جىلى جامبىل وبلىسىندا تۋعان. ول  –  سيدنەي وليمپياداسىنىڭ جەڭىمپازى جانە اتلانتا وليمپياداسىنىڭ قولا جۇلدەگەرى. سونداي-اق، ە. ىبرايىموۆ اتلانتا مەن سيدنەيدەگى وليمپيادادا قازاقستاننىڭ تۋىن ۇستاپ ءوتتى. 

    ازيا چەمپيونى (1995 جىل)، الەم چەمپيوناتىنىڭ كۇمىس جۇلدەگەرى (بۋداپەشت ق، 1997 جىل)، ازيا ويىندارىنىڭ چەمپيونى (1998 جىل)، الەم چەمپيوناتىنىڭ قولا جۇلدەگەرى (حيۋستون ق، 1999 جىل)، ق ر بوكستان ەڭبەك سىڭىرگەن سپورت شەبەرى جانە ق ر بوكستان ەڭبەك سىڭىرگەن جاتتىقتىرۋشىسى. سونىمەن قاتار، ول I دارەجەلى «بارىس» (2000 جىل) وردەنىمەن، «ەرەن ەڭبەگى ءۇشىن» مەدالىمەن ماراپاتتالعان (1996 جىل)، «دارىن» مەملەكەتتىك جاستار سيلىعىنىڭ لاۋرەاتى (2000 جىل).   

    ەڭ جاڭا قازاق ەلى تەلە حابارلارى